La vera cotelètta a la milanesa la gh’è domà a Milan!
Quèlla vera la gh’ha de vègh on diametro almen de 15 ghèi, la pò vèss de vitèll ò de porscèll e guai se la gh’ha nò el manich (l’òss), per intendes: la cotelètta l’è on quaicòss de divers dai fettin impanaa. La gh’haa de vèss servida croccanta e fragranta, sottil e ben dorada in l’impanadura che l’esaltarà el savor de la carna.
Ingredient per 4 persònn
4 cotelètt de vitèll ò de porscèll
100 gramm de butter
2 oeuv
Pan sècch grattaa (con la grattiroeula nò portaa via al vesin de cà)
Farina 00 quanto basta
Saa
I cotelètt de vitèll vann appèna battuu cont el pèstacarna fintant ch’el spessor el sia pari a quèll de l’òss.
Sbatt ben ben i oeuv in d’ona fondina fasend memòria de mèttigh dent on ciccin de saa.
Gratta el pan sècch in manera on poo ordinaria (grossolan)
Passa a voeuna a voeuna i cotelètt in l’oeuv sbattuu, poeu in la farina, quindi in del pan grattaa in manera che quèst’ultim el se tacca ben ben a la carna (se occor schiscia polito cont i man). Tutt quèst fall per dò vòlt.
In d’ona padèlla fá dislenguà cont el foeugh bas, bas, el butter e poeu mèttegh denter i cotelètt e coeusi prima d’ona part e poeu de l’altra fin a fagh ciappà on bèll color doraa, fá attenzion de minga brusai tròpp.
Me raccomandi mèttii in tavola bèi sbrojent e bon appetitt!