Na vòlta eren òmm
d’on meter e vottanta,
bèi pacciaròtt ‘me on pòmm,
figura importanta
Negher in la divisa
ma coi sò guant tutt bianch,
chi le ciamava “Ghisa”,
chi inveci “Sorvegliant”.
Piantaa in mèzz al carròbbi
‘me on palo de lampion
ò ‘me on pianton de pobbi,
elmètt con medajon,
par de vedè sul scagn
d’orchèstra on direttor
dirig, senza fà dagn
e senza fà error,
el traffich bisabos
che gh’è in tutta Milan
che l’è ona vera cros
ormai da tanti ann.
Gh’avevom suddizion
vedèll rivà in divisa.
in strada col ballon…
“Òccio che gh’è chì ‘l ghisa”
Incoeu a l’è pù inscì,
gh’è pù la suddizion
del ghisa col chepì
e cont el medajon.
Incoeu hinn tutt fighètta
divisa celestin,
cappèll con tant de alètta,
ghe manca el farfallin.
Tutt’imboscaa in offizzi:
trovan vun?… col piffer!
Al bar hinn in servizzi
hinn là a gustass on chifer.
