Menà i tòll, ovvero svignersela. Facile da intuire, ma meno noto è da dove arriva questo modo di dire in dialetto milanese. Ce lo spiega il nostro Carletto Oblò.
Quèll che voeur dì, el me par ciar “svignarsela” ma da indoe la nass ‘sta manera de dì?
Bisògna andà in là on poo in del temp e precisament quand i galeòtt pericolos, vegniven nò domà saraa-sù dent in on busegatter, ma vegniven anca legaa con di gròss cadènn ai pee e poeu a ògni presonee ghe andava daa in dotazion on gròss boccal ch’el serviva per bev ma anca el faseva de gavètta.
El boccal (che tutti ciamaven “la tòlla) l’era fissaa, per el manich de presa, ai cadènn, de manera che, anca senza avèghen l’intenzion, el podeva servì come campanèll d’allarma in cas de fuga.
Me par ciar che se el galeòtt el decideva de scappà, el boccal (la tòlla) l’avaria faa tant de quèll frecass d’insospettì, quantomen, i guardian.
Ècco d’indoe nass la manera de dì”menà i tòll”.
