Appèna finii la guèrra, ghe n’era minga… e allora vegniva bon anca el salamm de baslètta.
Me ricòrdi che la mia mama la me mandava in del cervellee a comprann 50 franch e quand al cervellee ghe disevi:”Mi dia 50 lire di salame di baslètta” lù el rideva e per toeumm in gir el me diseva:”Ghe n’hoo pù, te doo 50 franch de repubblica” che saria poeu la stèssa ròba.
Infatti in del cervellee el salamm de baslètta e e la repubblica hinn la stèssa ròba e el perchè l’è quèst: ona vòlta, el meneghin DOC per dì “è una confusione” el diseva “l’è ona repubblica” e dato che el salamm de baslètta l’è ona confusion de ritaj de salamm, confusion per confusion se dis anca “repubblica”