La sera l’è già chì, tra on poo l’è nòtt
e ven-sù dal Navili la scighera
che col sò vèll la quatta-giò in d’on bòtt
tutt quèll che se fa incontra, in la manera
de trasformà Milan in d’on scartòzz
pien de nostalgia, pien de tusscòss.
Se pizzen i primm ciar in su la Riva,
la gent la se ritira già in di cà,
la sbassa-giò la clèr la privativa,
se veden i bottegh illuminaa…
Pien de sabbia, de gera e de carbon
hinn ‘dree rivà a Milan i ultim barcon;
scarlighen sul Navili silenzios,
je guida el barchiroeu col sò timon;
se sent ona canzon cantà sòttvos
e te se streg el coeur in d’on magon,
ona canzon che hoo imparaa anca mì
che canti quand son soll, indepermì:
‘’ Quand el mè coeur el se fa-sù in l’arlia,
quand stròzzen i penser, i mè magon,
quand sta lontan de Tì, Madòna mia,
mì gh’hoo pù nanca on minim d’illusion,
te preghi, guarda giò ‘sto meneghin,
dagh ona man e stagh semper vesin!’’