El 14 de settember l’è el dì de l’Esaltazion de la Santa Cros. In Dòmm, a Milan, da on bèll poo de sècol se celebra la fonzion del “Sacro Ciòd”.
Ma de cos’è che se tratta?
Beh, vedarèmm de dagh ona rispòsta a chi pòcch ch’el sann nò.
El document pussee vègg ch’el fa riferiment al “Sacro Ciòd” l’è del 1389, se tratta d’ona domanda fada a Giangaleazzo Visconti per trasferì in Dòmm vun di ciòd de la Cros, ma se ghe dèmm a trà a la legenda del “Sacro Ciòd” se ne parla giamò dal temp de Sant Ambroeus.
Hinn tanti i stòri che circonden ‘sta reliquia e come l’è rivada a Milan: chi dis che l’è stada sconduda per evità la furia “iconoclasta” de Leone III Isaurico, Imperador d’Orient (VII secol); chi dis che l’è stada portada dai Rè Magi e poeu sistemada in Sant Eustòrg; chi dis che l’è stada regalada al Vèscov Arnolf dal Rè Ottone III insèma al serpent de Mosè; di alter anmò disen ch’el “Ciòd” l’è rivaa a Milan cont i Crociat. El “Sacro Ciòd” incoeu l’è sistemaa in alt, sora l’altar maggior del Dòmm in on reliquiari de cristall ch’el fa part d’ona gran cros e sistemaa in la “Nivola”.
Ògni ann, al 14 de settember se celebra la suggestiva fonzion de la “Nivola”
La “Nivola” l’è ona specie d’ascensoeur a forma de nivola progettaa in di primm ann del ‘700, in origin el fonzionava cont on arghen movimentaa con di còrd, adèss l’è elettrich. El Vèscov de Milan el se sistema in la nivola che la ven tirada-sù a quasi quaranta meter sora l’altar per prelevà el “Sacro Ciòd”, la reliquia pussee preziosa de tutta la Diòcesi ambrosiana.
El “Sacro Ciòd” el ven portaa a tèrra e miss in bèlla vista per la venerazion di fedel.
Finida la fèsta, el “Sacro Ciòd” el ven miss anmò al sò pòst.
Altra curiosità: chi guarda ben el ciòd el vedarà ch’el gh’ha nò la tèsta , ma al sò pòst on anèll che a soa vòlta l’è taccaa a on alter anèll; in la teca gh’è nò domà el ciòd ma anca on tòcchèll de fil de fèrr e ona specie de cavallòtt con duu anèi a l’estremità, per la soa somiglianza cont on mòrs de cavall el “Sacro Ciòd” el ven anca ciamaa el “Sacro Mòrs” con riferiment a l’antiga credenza che la dis che con vun di ciòd de la Cros, Elena, la mama de l’Imperador Costantino, l’abbia faa forgià el “frenum” del cavall del sò fioeu.