El tredesin de Marz

In del 51 d.C. riva a Milan on cipriòta che de nòmm el faseva  Barnaba, l’era staa mandaa da San Paol de Tarso per predicà i vangeli in Occident. Barnaba l’era on gran bèll òmm, alt, cont in cavèi longh e ona vos che la faseva tremà tanto l’era potenta e che in quèll temp la vegniva paragonada a quella del dio Giove.

‘Sto òmm, de gran carisma, el riva in Milan da Pòrta Oriental, ma prima de rivà in città el pianta el sò baston, a forma de cros, in ona gròssa prèia che gh’era lì vesin a ona gran rògora, el se mètt in genoeugg e el comincia a pregà.

L’è el 13 de marz, per i pagan el primm dì de primavera. La leggenda la cunta che quand Lù el passava per i strad de Milan, i statov, dedicaa ai dèi pagan, borlaven giò, i templi se creppaven e che anca i vestal (fòrsi perché l’era on bèll òmm) provaven ona cèrta inquietudin.

El Barnaba l’ha cominciaa inscì la soa òpera de predicador e i prosèlit aumentaven a cent a cent. I autorità de Ròma, probabilment per la soa eloquenza e la soa personalità, gh’hann faa pròppi nagòtt. Barnaba l’è mòrt a Cipro lapidaa dai ebrèi appèna fenii la soa mission milanesa. La soa tomba l’è stada troada tanti ann dòpo e quand l’hann dervida, hann troaa on Barnaba anmò tutt intregh in la posizion de predicador e cont el vangeli de San Matteo in sul stòmegh.

Milan la gh’haa avuu tanti “protomartiri” ma el Barnaba l’ha lassaa on sègn particolar in del coeur di milanes e in del pòst indoe el Sant l’aveva piantaa el sò baston in del sass i milanes hann tiraa-sù ona cappèlla dedicada a San Salvador, doe per tanti ann i milanes, ògni 13 de marz, eren sòlit portà cer e fior. Intorna a la cappèlla l’è stada poeu costruida la gesa de San Dionigi, demolida in del 1783, adèss al sò pòst gh’è el Planetari.

I reliqui del Sant e la prèia indoe l’era staa piantaa el crocefiss se troeuven conservaa in la gesa de Santa Maria del Paradis, a Pòrta Vigentina. Lì gh’è nassuu la fèsta del 13 de marz, con l’esposizion e la vendita de fior e ancamò incoeu la fèsta l’è riconossuda come la ricorrenza del “tredesin de marz”.