Un rito cristiano che si celebra il venerdì Santo. Ecco la spiegazione in dialetto.
I scuroeu
L’è el rito cristian che se ricòrda e se celebra el venerdì sant per domandà perdon di nòster peccaa.
El scuroeu el consist nel pregà davanti al sepolcher: “el scuroeu”, ch’el ven preparaa in di gés. L’usanza la stabiliss che occor ripètt i orazioni in sètt gés different. A Milan l’usanza l’era quèlla de visità i sètt gés doe se troeuven i sètt capp d’òpera che riguarden la Passion.
I sètt gés hinn:
Santa Maria di Grazi, cont el Cenacol del Leonard
Santa Maria de la Passion, cont el Cenacol del Ferrari
San Maurizzi al Monastee Maggior, cont el Cristo ligaa a la colònna del Luini
Sant Ustòrg, cont el Cristo patiens
San March, con l’affrèsch gòtich de la Passion
Santa Maria taccaa San Satir, cont i quattòrdes statov de la pietà del De Fendutis
San Fedel, con la deposizion del Pederzano.
Ma chi balòss de milanes, semper pront a mes’cià el sacro cont el profan, ghe dann on’alter significaa a la manera de dì:” Fà el gir di sètt gés”, la doperen per dì che i cioccatee fann el gir de sètt osterii.